पत्रकार किशोर म्हमाने यांच्यावर दहा जणांचा जीवघेणा हल्ला

 पत्रकार किशोर म्हमाने यांच्यावर दहा जणांचा जीवघेणा हल्ला

तलवारी, कट्ट्या व लोखंडी रॉडने मारहाण; पत्रकारांचा पोलिस ठाण्यासमोर ठिय्या आंदोलन, आरोपींना तात्काळ अटक करण्याची मागणी

सांगोला/प्रतिनिधी :

 सांगोला येथील पत्रकार किशोर म्हमाने यांच्यावर दहा जणांच्या जमावाने तलवारी, कट्ट्या व लोखंडी रॉडने हल्ला केल्याची गंभीर घटना घडली आहे. या हल्ल्यात म्हमाने गंभीर जखमी झाले असून, या घटनेमुळे सांगोला शहर व तालुक्यात खळबळ उडाली आहे.

सांगोला शहर व ग्रामीण भागात अलिकडील काळात गुन्हेगारीचे प्रमाण वाढत असल्याची भावना नागरिकांमधून व्यक्त होत आहे. यापूर्वीही प्रतिनिधींवर व पोलिस प्रशासनावर दबाव असल्याने पोलिस यंत्रणा अधिक दक्ष राहूनही अनेक गुन्हेगारांना कायद्याची भीती राहिलेली नसल्याची चर्चा नागरिकांमध्ये सुरू आहे.

या पार्श्वभूमीवर पत्रकार किशोर म्हमाने यांच्यावर झालेल्या हल्ल्याच्या निषेधार्थ सांगोला शहर व तालुक्यातील विविध माध्यमांचे पत्रकार एकत्र आले. त्यांनी सांगोला पोलिस ठाण्यासमोर ठिय्या आंदोलन करून हल्लेखोरांना तात्काळ अटक करून कठोर कारवाई करण्याची मागणी केली.

दरम्यान, म्हमाने यांच्यावर यापूर्वीही हल्ला झाल्याचा उल्लेख असून, संबंधित आरोपींवर तातडीने गुन्हा दाखल करून अटक करण्यात यावी, अशी मागणी पत्रकारांनी केली. आंदोलनाची दखल घेत पोलिस अधिकाऱ्यांनी आंदोलक पत्रकारांशी चर्चा करून कारवाईबाबत आश्वासन दिल्याचे सांगण्यात आले.

पत्रकारांवरील वाढत्या हल्ल्यांच्या घटनांमुळे पत्रकारांच्या सुरक्षेचा प्रश्न पुन्हा एकदा ऐरणीवर आला आहे. पत्रकार किशोर म्हमाने यांच्यावर झालेल्या हल्ल्यातील आरोपींना तात्काळ अटक करून त्यांच्यावर कठोर कायदेशीर कारवाई करण्यात यावी, अशी मागणी पत्रकार संघटनेकडून करण्यात आली आहे.

डिजिटल मीडिया संपादक पत्रकार संघटनेनेही या घटनेचा तीव्र निषेध व्यक्त केला असून, हल्ल्यातील आरोपींना तात्काळ अटक करून कारवाई न झाल्यास तीव्र आंदोलन छेडण्याचा इशारा देण्यात आला आहे. पत्रकारांवर हल्ला करणाऱ्यांवर कठोर कारवाई करून पत्रकारांना सुरक्षित वातावरण उपलब्ध करून द्यावे, अशी मागणी यावेळी करण्यात आली.

विशेष चौकट

🟥 पत्रकारांच्या सुरक्षेचा प्रश्न पुन्हा ऐरणीवर

पत्रकार किशोर म्हमाने यांच्यावर झालेल्या जीवघेण्या हल्ल्यामुळे पत्रकारांच्या सुरक्षेचा गंभीर प्रश्न निर्माण झाला आहे. हल्लेखोर आरोपींना तात्काळ अटक करून कठोर कारवाई करण्यात यावी, अशी मागणी सांगोला शहर व तालुक्यातील पत्रकारांनी केली आहे. पत्रकार संघटनांनी या घटनेचा तीव्र निषेध नोंदविला असून, आरोपींवर तातडीने कारवाई न झाल्यास तीव्र आंदोलन करण्याचा इशाराही देण्यात आला आहे. पत्रकारांवर हल्ला करणाऱ्यांवर कठोर कारवाई करून पत्रकारांना सुरक्षित वातावरण देण्याची मागणी जोर धरत आहे.