*कृषि उत्पन्न बाजार समिती सांगोलाची वार्षिक सर्वसाधारण सभा उत्साहात संपन्न*
*संस्थेच्या इतिहासात पहिल्यांदाच रेकॉर्डब्रेक वार्षिक नफा*;*आर्थिक प्रगतीमुळे उपस्थितांमध्ये समाधान*
*सांगोला प्रतिनिधी*
कृषि उत्पन्न बाजार समिती सांगोलाची वार्षिक सर्वसाधारण सभा मंगळवार, दिनांक ३० जून २०२६ रोजी दुपारी ठीक १:०० वाजता संस्थेच्या प्रशासकीय सभागृहात उत्साहात व शांततेत पार पडली. या सभेला शेतकरी, व्यापारी, हमाल, तोलार, आडते तसेच स्थानिक जनप्रतिनिधींची मोठ्या संख्येने उत्स्फूर्त उपस्थिती लाभली.
कार्यक्रमाच्या सुरुवातीला संस्थेचे सचिव श्री. उत्तम राजाराम खोकले यांनी उपस्थितांचे हार्दिक स्वागत केले. त्यांनी कृषि विकास सोसायटीचे चेअरमन, संचालक मंडळाचे सर्व सदस्य, ग्रामपंचायत सरपंच व सदस्य, शेतकरी, व्यापारी, हमाल, तोलार आणि आडते या सर्वांचे सभेस उपस्थित राहिल्याबद्दल विशेष आभार व्यक्त केले. सचिव उत्तम खोकले यांनी सांगितले की, बाजार समिती ही शेतकरी व व्यापाऱ्यांच्या हितासाठी काम करणारी महत्त्वाची संस्था असून सर्वांच्या सहकार्यानेच तिची प्रगती शक्य होते.
यानंतर संस्थेचे लेखापाल श्री. महेंद्र मोहन वाघमारे यांनी विषय पत्रिकेवरील सर्व विषयांचे सविस्तर वाचन केले. त्यांनी सन २०२५-२०२६ या आर्थिक वर्षाचा लेखाजोखा सादर करताना सांगितले की, या वर्षात संस्थेला एकूण रु. ३,२०,४८,५१३/- इतके उत्पन्न मिळाले. याउलट खर्च रु. १,३७,०४,८४१/- झाला. परिणामी संस्थेला रु. १,८३,४३,६७२/- इतका नफा झाला. ही रक्कम संस्थेच्या इतिहासात प्रथमच नोंदवली गेलेली रेकॉर्डब्रेक वार्षिक नफा असल्याचे त्यांनी स्पष्ट केले. या आकडेवारीमुळे संस्थेची आर्थिक स्थिती मजबूत असल्याचे आणि व्यवस्थापनाच्या कार्यक्षमतेचे द्योतक असल्याचे उपस्थितांसमोर मांडले गेले. उपस्थितांनी या आर्थिक प्रगतीबाबत समाधान व्यक्त केले.
सभेच्या अध्यक्षस्थानी संस्थेचे सभापती श्री. समाधान पाटील होते. उपसभापती श्री. माणिकचंद वाघमारे तसेच संचालक मंडळातील श्री. विनायक कुलकर्णी, श्री. आबासाहेब आलदर, श्री. धनाजी पवार, श्री. रामचंद्र बाबर, श्री. अमजद बागवान, श्री. अमोल खरात, श्री. किशोर शिंदे, श्री. दिपक गोडसे, श्री. संतोष देवकाते, श्री. विष्णु सरगर, श्री. दगडू गावडे, श्री. हेमंतकुमार शिंदे, श्री. बाळासो काटकर, श्री. चंद्रकांत करांडे, सौ. शोभा पवार आणि श्रीमती प्रमिला चौगुले आदी उपस्थित होते.
सभेदरम्यान संस्थेच्या कामकाजाबाबत थोडक्यात चर्चा झाली. सभापती श्री. समाधान पाटील बोलताना म्हणाले की, आमदार डॅा.बाबासाहेब देशमुख यांच्या मार्गदर्शनाखाली संस्थेची यशस्वी घोडदौड चालू असून संस्थेच्या प्रगतीसाठी सर्वांनी एकत्रितपणे काम केल्याचे कौतुक केले. त्यांनी शेतकरी व व्यापाऱ्यांना बाजारातील सुविधा सुधारण्यासाठी सहकार्य करण्याचे आवाहन केले. सभेच्या शेवटी सभापती समाधान पाटील यांनी सर्व उपस्थितांचे मनःपूर्वक आभार मानले आणि सभा संपल्याचे जाहीर केले.
ही वार्षिक सर्वसाधारण सभा पूर्ण शांततेत, सुव्यवस्थापूर्वक व उत्साहात पार पडली. संस्थेच्या आर्थिक प्रगतीबाबत उपस्थितांनी समाधान व्यक्त केले. बाजार समितीच्या या रेकॉर्डब्रेक कामगिरीमुळे सांगोला तालुक्यातील शेतकरी व व्यापाऱ्यांमध्येही आनंदाची लहर पसरली आहे.
إرسال تعليق