*शिक्षकांच्या न्याय हक्काचा बुलंद आवाज - जिल्हाध्यक्ष अमोगसिद्ध कोळी गुरुजी!*
सांगोला प्रतिनिधी :-
आयुष्याच्या वाटा कुणासाठीही सोप्या नसतात, पण काही व्यक्ती आपल्या कर्तृत्वाच्या आणि जिद्दीच्या बळावर स्वतःचाच नाही, तर हजारो जणांच्या आयुष्याचा मार्ग उजळून टाकतात. मातीतील गंध जपणारे, संकटांशी दोन हात करत संघर्षातून तावून सुलाखून निघालेले आणि सांगोला तालुक्याच्या मातीचा मान उंचावणारे एक जाणते नेतृत्व म्हणजे अमोगसिद्ध कोळी गुरुजी!
नुकताच सांगोला येथे पार पडलेला महाराष्ट्र राज्य प्राथमिक शिक्षक समितीचा पुणे विभागीय पदाधिकारी व कार्यकर्ता मेळावा म्हणजे कोळी गुरुजींच्या अफाट संघटन कौशल्याचा आणि कर्तृत्वाचा एक सुवर्णसोहळा होता. सोलापूर जिल्हा शाखा आणि जिल्हा कार्यकारिणीने अत्यंत दिमाखात पार पाडलेला हा सोहळा म्हणजे कोळी गुरुजी व समितीच्या जिल्हानेत्यांच्या अथक परिश्रमांचे फलित होते. याच ऐतिहासिक क्षणी सांगोल्याचे लाडके आमदार भाई डॉ. बाबासाहेब देशमुख साहेब यांच्या शुभहस्ते अमोगसिद्ध कोळी गुरुजींचा झालेला सत्कार हा केवळ एका व्यक्तीचा सन्मान नसून, तो या संपूर्ण शिक्षक चळवळीचा आणि निस्वार्थ संघर्षाचा झालेला गौरव होता!
कोळी गुरुजी म्हणजे तळमळीचा चेहरा आणि वाड्या-वस्त्यांवरील शिक्षकांचा हक्काचा माणूस.
सांगोला तालुक्यातील घेरडी या गावाचे सुपुत्र अमोगसिद्ध कोळी गुरुजींचा प्रवास म्हणजे प्रेरणादायी धडा आहे. वाड्या-वस्त्यांवर शिकणाऱ्या आणि नोकरी करणाऱ्या प्रत्येक शिक्षक बंधू-भगिनीसाठी ते केवळ एक जिल्हाध्यक्ष नाहीत, तर हक्काचे मोठे भाऊ, संकटसमयी धावून येणारा सच्चा मित्र आणि आधारवड आहेत. जनसामान्यात अगदी सहज मिसळणारा, प्रत्येकाच्या सुख-दुःखात समरस होणारा हा माणूस जेव्हा शिक्षकांच्या न्याय हक्कासाठी लढायला उभा राहतो, तेव्हा त्याची प्रत्येक ओळ, प्रत्येक शब्द अन्यायाविरुद्ध पेटून उठणारा वज्रघात बनतो.
बाहेरून पाहणाऱ्याला कोळी गुरुजी अत्यंत कणखर आणि लढवय्ये वाटतात, पण त्यांच्या आत दडलेले मन अतिशय हळवे आणि संवेदनशील आहे. कोणाचेही दुःख पाहून पाझरणारे मन आणि मदतीसाठी कायम पुढे असणारा हात ही त्यांची खरी ओळख आहे. केवळ एक राजकारणी किंवा संघटक नव्हे, तर एक खेळाडू, ग्रंथालय चळवळीचा निस्सीम कार्यकर्ता आणि वाचनाची आवड असणारा हा सुसंस्कृत नेता आहे. आज सोलापूर जिल्ह्याचा शिक्षक समितीचा गड ज्या सक्षमपणे, धैर्याने आणि स्वाभिमानाने त्यांनी सांभाळला आहे, त्याला तोड नाही.
त्यांच्यासाठी संघटना हेच जीवन, समिती हेच विश्व आहे.आजच्या धावपळीच्या युगात स्वतःच्या कुटुंबाला, संसाराला वेळ देणे कठीण असते; मात्र अमोगसिद्ध कोळी गुरुजींनी संघटनेसाठी आणि शिक्षकांच्या हितासाठी आपल्या संसारालाही कधीकधी बाजूला सारले. "माझी शाळा, माझे शिक्षक आणि माझी संघटना" हेच ज्यांचे श्वास आहेत, असा हा विरळा माणूस आहे. प्रसंगी स्वतःच्या आरोग्याची पर्वा न करता, तन-मन-धनाने दिवसरात्र एक करून संघटना वाढीसाठी झटणारा हा कार्यकर्ता म्हणजेच संघटनेचा खरा प्राण आहे.
जेव्हा जेव्हा शिक्षकांवर संकट येते किंवा प्रश्नांचा डोंगर उभा ठाकतो, तेव्हा कोळी गुरुजी सर्वांचा आवाज बनतात.
"प्रश्न कोणताही असो, उत्तर एकच—अमोगसिद्ध कोळी गुरुजी!"
आदरणीय कोळी गुरुजी, आपण सुरू केलेली ही संघर्षाची, सेवेची आणि न्यायाची वाटचाल अशीच अविरत आणि अधिक दिमाखात सुरू राहो. आपल्या या यशस्वी आणि धडाडीच्या कारकिर्दीला आमचा मानाचा मुजरा! आपल्या हातून शिक्षकांच्या कल्याणाची आणि समाजाच्या उत्थानाची अशीच अनेक ऐतिहासिक कामे घडत राहोत, हीच ईश्वरचरणी आणि साक्षात सिद्धनाथाच्या चरणी प्रार्थना!
आपला हा प्रवास असाच भरभराटीचा जावो, हीच सदिच्छा!
*-आपला एक जवळचा मित्र*
Post a Comment